DIY Bear - 熊的靈魂

人既靈魂之窗係眼睛~ 其實造熊仔時都係一樣, 一對眼睛足以影響成隻熊仔既神態。
 唔同大細﹑距離﹑高低, 差少少可能佢個樣都會唔同左好多~

所以上眼睛之前一定要用大頭針mark位, 除左高低要一樣, 左右距離要平均,比較安全既做法係,先係鼻尖上用大頭針mark一點, 然後用間尺, 對正左邊耳仔正中間同鼻尖, 係兩點既中間mark上左眼,右邊同樣做法, 咁得出既眼睛就會對稱。
而裝眼睛落針果陣, 如果左眼係大頭針上方落針,咁右邊都要一樣係上方落針

 裝完眼睛之後, 如果覺得對眼俾D毛毛遮住變得太細,亦可以修剪一下眼睛附近既毛毛,但唔好剪到落底, 修短就好了, 如果唔係就會禿左一忽架啦~
另外,  拉緊眼睛果陣左右既力度都要平均D,盡量令頭內棉花左右平衡

 影相前記得幫佢執執D眼毛.. chok一chok先呀~:D

DIY Bear 熊仔的聖誕帽製作方法

仲有一個月左右就到聖誕節~好多商場都亮起聖誕裝飾啦~
熊生都唔執輸~整返頂聖誕帽型一型先~

DIY 熊仔既聖誕材料包已經ready啦~入面有聖誕帽既製作材料, 同埋紅色&綠色絲帶。如果唔識整聖誕帽,可以依以下方法整~

材料包內有紅色絨布及白色毛毛布

將白色毛毛布兩側向內摺, 摺成一條長條狀 (好似右面張白色咁摺)

白色布再對摺夾住紅色布的圓邊, 一邊夾一邊用白色線上下縫合固定 (因白色毛毛夠長, 用白色線縫唔會俾人見到縫線架~)

白邊縫好的樣子

將帽對摺, 縫合一條直線 (如圖中左面的縫線)

縫好後返出正面~ 完成啦~~

可用針線固定係耳仔/頭頂~或影相時先幫佢戴啦~

Handmade Bear(๑￫ܫ￩)

嘩蝦蝦~好靚仔呀~♡￫ܫ￩♡


DIY Teddy Bear Kit - 手縫絨毛小熊材料包：
由你自己一手一腳﹑一針一線製出嘅毛毛熊。熊仔嘅頭同四肢都可以活動，擺唔同甫士影相都難佢唔到。

DIY材料包內有齊所有製作小熊嘅材料，包括：絨毛布﹑熊仔活動關節﹑專用針﹑眼睛﹑填充棉及絲帶等等，內附紙樣及圖文並茂嘅彩色印刷教學流程。
自備工具：剪刀﹑針線﹑大頭針﹑水消筆(或以其他筆代替)
你只要懂得基本針線縫紉技巧，唔需要擔心手工唔好影響作品外觀，因為長絨毛嘅優點係會遮蓋接合位。

製成品身長大約27cm，坐低約高20cm(人手製作的熊每隻大小可能有些微差距)
你仲可以隨個人喜好，繡字/圖案(如名字﹑出生/特別日期等)於小熊腳掌上，或幫佢加上唔同嘅裝飾品，令佢成為獨一無二而且更有意義嘅可愛熊仔。

顏色：淺啡/深啡
預計製作時數：10小時
 
如果想訂購的話，歡迎到facebook fanpage send inbox msg啊（●´∀｀）ｖ
 LIAN Handicrafts facebook

簡單的繡字方法

送自己手造的小熊給別人，如果小熊腳板上有對方/自己的名字，或是結婚紀念日﹑生日日期，就更有紀念價值啦。ヾ（*´∀`*）ﾉ゛

以下是初學者都可以輕易掌握的繡字方法

一般刺繡都會用繡花線，使用時要剪下適量長度並抽出其中２－３根幼線。

如家中沒繡花線，亦可以一般縫線代替，只要一次過穿２－３根線即可。

這次示範會用同色的縫線及繡花線，其實效果真的差不多((●･ω･)ﾉ

繡字開始～先在布上畫上要繡的字，可用水消/畫布筆，萬一繡完字仍見到筆跡都可輕易洗刷掉

將２或３根線（視乎你想字體的粗幼度而定啊）穿過針眼

線尾打結。

針由布的底部入，布面出，以全回針步依照字樣縫一遍

全回針步的縫法可參考上一篇文章："http://lianhandicrafts.blogspot.hk/2013/11/blog-post.html"

縫好一遍後，翻到後面打結，剪走多餘線尾即可。

完成了ヽ(*ﾟｰﾟ*)ﾉ

如果想字體更粗更明顯，可以畫一個2D的字

這次不用全回針步，而是在字體兩側的畫線，針在下線入，上線出，一直填滿字體；在轉彎位只要打斜就可以了。

填滿後在布底打結剪線就完成了。

兩種方法的分別。（兩個都是用一般縫線繡的）

上面是用縫線，　下面是用繡花線。我覺得真的沒分別呢，只是繡花線可以選的顏色比較多咯，而且有些會比較滑，有些的質地較特別啦。(*´ω`)/

基本手縫技巧總匯

最近LIAN既facebook fanpage終於面世，忙左一個星期，係時候update下個blog啦~

以下會Share一D我覺得清楚易明既Youtube video，結集唔同既基本針步教學，方便做唔同手作既時候可以用到~



平針縫 -- 將針線一上一落遊走於兩塊布之間，簡單地將兩塊布縫合，但要注意針步要細同密，如果唔係製成品既縫合位就會好易散同埋一折一折；作基本縫合時，要小心唔好拉太緊，否則製成品會唔平順。　平針縫亦可以作為「縮縫」，只要用平針縫疏疏地咁縫一次，到最後拉緊布塊，就可以做到縮起同皺起既效果。（PS: 做熊仔頭時就係要用縮縫來收緊熊頭啦。）

全回針縫 -- 多數用於裝飾縫線同刺繡，效果比例整齊，好似衣車車出來既咁，而且好穩固，適用於手縫布袋。
半回針縫 -- 同全回針縫一樣，都好穩固，但就只回半步，布面會好似平針縫既效果，但布底會同全回針縫一樣，有一條重疊既線。（P.S: 做熊仔最好就用半回針，因為比平針更牢固，又比回針快，縫合位置都係內部，唔會有人睇到，所以用半回針就最好）

藏針縫 -- 主要用係返口位置，當兩片布縫合好並於返口處返出後，可以藏針縫（以下教學叫做對針縫）縫好返口，其實原理同平針縫一樣，只不過係換左個方法去縫，所以記得針距都要細密，而且唔可以拉太緊，如果唔係就會起狗牙一舊舊架啦。

手作必備 - 布包鈕 (工具介紹及教學)

 

鈕扣除左用於袋口同衣物上，好經常都會用於手作既裝飾，個人最最最鍾意布包鈕，無論整乜野，加粒布包鈕就好似畫龍點晴咁，當堂靚哂～仲有就係可以用盡手上既布料，細細塊既碎布都可以用埋來做布包鈕。

10年前如果想整布包鈕，就要帶埋D布去深水埗搵人整，整一粒就要幾蚊雞！但而家買手作工具真係方便左好多！以下介紹２種唔同既布包鈕工具：

一）布包鈕模具及壓鈕機

 係木板上既係布包鈕專用模具，唔同Size要配返各自既鈕去用，大細同形狀有好多款，細至0.5cm大至8cm直徑，圓形方形星形心形磨菇形，仲可以揀膠或鐵﹑平底或鈕扣托底，方便for唔同既手作用途。

用法：

剪出大於或等於模具圓周大小既布料

（左）將布正面向下，鈕扣面向下並將布壓入模具上半部份內
（右）將鈕扣托底底部向下放入模具下半部份內

模具的上下部份組合一起

將整個模具放入壓鈕機下，拉下把手壓緊

打開模具後取出鈕扣，搞掂！

平底同鈕扣底既分別

 以上模具同壓鈕機都可以係淘寶買到，模具一套(1個款/size)大約RMB30幾左右，而壓鈕機大約RMB 90 - 100，要注意既係兩者都幾重，淨係運費到香港都要百幾蚊，加加埋埋成套都要成HKD$300，還好D鈕扣每套好平，幾蚊就有幾十至一百套，如果用得多的話都幾化算～

 二）簡便布包鈕套裝（日本大創）

 細細地一套入面已經有齊要用既工具，好方便，size由1.8cm至3.5cm不等。

利用盒內紙樣剪出布塊

將布正面向下放於白色膠器具，扣面向下扣入器具中

放入扣底

用有顏色既器具，用力壓實鈕扣

完成！

 簡便version係$12蚊店可以買到，就算同size都有２款，一款數量多d，另一款會少一半，即係一個平一個貴，貴果個真係會好用好多，個器具軟身d，容易d拎返粒鈕出來，而且鈕扣整出來亦實少少。

雖然Size同款式唔多，但都夠應付一般既手作作品製作。同用機壓出既布包鈕比，會冇咁實淨，有機會用得耐會容易鬆開，而且亦比較貴，一粒都要1蚊以上。（有補充裝可以買，冇器具但鈕數量會多d抵用d）

如果你識刺繡，不妨試下繡花/字係布上，再用來做布包鈕丫～

LIAN

"LIAN"係大學時一班懶惰朋友幫我改嘅花名，讀音係"Lillian"skip左第一粒音。(到後期懶到叫我做"人"......)

特以此為名，以紀念我班懶惰朋友，同燃燒左嘅青春。haha <3

Memo 紙的收納

自小學開始，我一直都有收集文具既癖好，好鍾意買好多筆(一套一套好多顏色, 連螢光筆都可以齊哂成套十隻色!!!水彩可以同時有3套....)﹑貼紙﹑膠紙﹑筆記簿﹑手工紙﹑有公仔既file﹑印仔等等，就連淨係畢業先要用既紀念冊我都有4-5本咁多.........但又唔捨得用架喎!!! 隔離位同學問我借文具都唔捨得借俾人。

當時我既夢想係開一間文具店！要有好多唔同既文具可以賣，唔同用途既筆﹑好colorful既紙﹑靚靚既貼紙等等。不過我而家諗返，如果真係俾我開到文具店，應該都會生意失敗，因為我會唔捨得賣D靚野出去LOL

(((圖為冰山一角的膠紙同貼紙)))

多年來儲落太多貨，發現收納memo紙係最麻煩，因為就咁拆左袋一疊疊放埋一齊佢地又會粘住好多塵而黑哂，唔拆袋既話莫講捨唔捨得用，就算真係想用都好唔方便去用‥‥

 最近又淘左好多memo紙..........為左安置佢地，又方便自己用，咁就DIY個folder放好佢地啦。

 用一個舊既紙質folder，搵張靚靚地既花紙(我呢個黑白直條其實原身係一個買野時拎返來既紙袋)包住個File做封面，入面又用另一張花紙/手工紙拼貼貼好，然後將所有memo紙用雙面膠貼哂係入面~方便用又唔驚佢有黑邊啦~










仲整左個袋仔放圓貼

如果我仲讀緊書，有左呢個Folder一定勁俾心機上堂乜鬼野Notes都抄一大餐..XDD